Փարիզի մէջ մահացաւ նախկին պոլսահայ յայտնի գրասէր ու արուեստասէր Եդուարդ Դարբինեան։ Տարուայ համարեա վերջին օրերուն զուգադիպող այս կորուստը խոր սուգի մատնեց պոլսաբնակ իր բարեկամները, որոնք յատկապէս ամառնային եղանակին Գնալը Կղզիին մէջ կը վայելէին իր մտերմութիւնը։
Եդուարդ Դարբինեան ծնած էր Թարլապաշը թաղը եւ իր նախնական ուսումը ստանալէ ետք տեղւոյն Մխիթարեան նախակրթարանի մէջ մեկնած էր Իտալիա։ Հոն նախ աւարտած էր տեղւոյ Մուրատ Ռաֆայէլեան վարժարանը, ապա շրջանաւարտ եղած Հռոմի համալսարանի մեքենական ճարտարագիտութեան բաժնէն։
Դարբինեան նաեւ ծանօթ հաւաքարար էր մանաւանդ իր ուշագրաւ գրադարանով։
