Կրկին կը թեւակոխենք յարութեան խորհուրդը։ «Մահուամբ զմահ կոխեաց», կամ ալ «Մահ չիմացեալ մահ, մահ իմացեալ անմահութիւն»։ Սուրբ Զատկի խորհրդով վերյիշուած երկու խորհուրդ, մին համաքրիստոնէական, իսկ միւսը ազգային։ Թէեւ համաքրիստոնէական կոչուածն ալ իր կարգին ունի քրիստոնէութիւնը գերազանցող բնոյթ, եթէ յիշենք Փիւնիկի առասպելը, որ իւրաքանչիւր անգամ իր բռնկած փետուրներէն կը վերակենդանանայ։
Մեզ՝ ակօսականներու համար յատուկ նշանակութիւն ունի նաեւ Սուրբ Զատկի Տօնը, քանի որ թերթիս անդրանիկ համարը լոյս տեսած էր 1996 թուի 5 Ապրիլին, նոյն Զատկի օր։
Ս. Զատկի ընդառաջ, 28 Մարտին կը յիշատակենք նախ սիրելի Սարգիս Սերովբեանիը իր մահուան տարելիցի առիթով։
Հազիւ օրեր առաջ էր, որ տօնեցինք նաեւ Նեւրոզը, նոյնպէս հեթանոսական շրջաններէ մեր օրերուն հասած վերածնման խորհրդով։ Եղանակը որքան ալ հերքէ, օրացոյցի համարով թեւակոխած ենք նոր գարուն եւ ընդառաջ ենք շրջանային վարչութիւններու ընտրութեան։
Ընտրութիւն՝ որ իր օրինական սահմանումէն շատ աւելի ծանրակշիռ նշանակութիւններով պիտի կայանայ։ Երկրի բոլոր քաղաքներուն եւ աւաններուն, նոյնիսկ թաղերուն համար կատարուած ընտրութիւններուն առանցքը կը կազմէ Պոլսոյ քաղաքապետի աթոռը։ Նոյնիսկ բովանդակ երկրի տարածքին յաղթանակով դուրս եկողն իսկ պարտուած պիտի համարուի, եթէ կորսնցնէ Իսթանպուլի քաղաքապետարանը։
Նախագահ Էրտողանի իշխանութիւնը իր բոլոր լծակները շարժման ենթարկած է, այս մեծ քաղաքը նուաճելու համար։ Նախարարաց Խորհուրդի բոլոր անդամները փողոց իջած են մասնակցելու համար իշխանութեան թեկնածու Մուրատ Քուրումի նպաստող քարոզարշաւին։
Դարձեալ Զատկի խորհուրդն է, որ մեզ կը թելադրէ այս պայքարն ալ ձուամարտի նմանութեամբ դիտելու։ Երկու հաւկիթներ իրար պիտի բախին եւ մենք Զատկի երեկոյեան պիտի տեսնենք թէ անոնցմէ որ մէկը ամուր դուրս եկած է այդ բախումէն, եւ որ մէկը ջարդուփշուր։
Խնդիրն այն է թէ այս հրմշտուքի մէջ մենք, հասարակներս պիտի տանինք գոյացած վնասի հատուցումը, նոյնիսկ գարնանամուտի, այլ խօսքով վերակենդանացման օրերուն։
