Հայաստանէ ներս հետզհետէ ծաւալող բարդոյթի մը վերածուած է գերտէրութիւններու հզօր ուժին դիմաց փոքր երկիրներու ճարահատութեան հոգեբանութիւնը։
Հայաստանի Հանրապետութեան Պաղեստինի պետականութիւնը լոկ մարդկային նախապատուութիւններով ճանչնալու որոշումը այդ բարդոյթի դէմ տրուած յստակ պատասխան մըն է։ Հայաստան իր այս որոշումով արդարացուցած է անկախ պետութեան նշանակութիւնը։ Հպարտօրէն մաս կազմած է նման վարք որդեգրած երկիրներու շարքին։ Այստեղ շատ կարեւոր հանգամանք է հրէատեաց ծուղակներէն խուսափելով Իսրայէլի պետութեան վարած քաղաքականութեան դէմ յստակ կեցուածք դրսեւորելը, մանաւանդ այն պահուն, երբ ԱՄՆ եւ Եւրոմիութիւն ամբողջովին մեղսակից դարձած են Իսրայէլի անմարդկային ռազմավարութեան։ Ճիշդ ալ այդ պահուն ալ աւելի ողջունելի կը դառնայ Հայաստանի որոշումը։ Ինք եւս ցեղասպանուած ժողովուրդի մը պետութիւնը՝ Հայաստան չի կրնար անտեսել նման
բնոյթի որեւէ յանցագործութիւն։
Այս գիտակցութիւնը որդեգրած իւրաքանչիւր հայ կ՚ողջունէ սոյն որոշումը, որուն մանրամասնութիւնները կը ներկայացնենք ներքեւի տողերով։
Հայաստան Ճանչցաւ Պաղեստին Պետութիւնը
Հայաստանի Արտաքին Գործոց նախարարութիւնը 21 Յունիսին յայտարարեց, թէ Երեւան պաշտօնապէս կը ճանչնայ Պաղեստին պետութիւնը։
«Կազա տիրող աղէտալի իրավիճակը եւ շարունակուող ռազմական հակամարտութիւնը այսօր միջազգային քաղաքական օրակարգի կարգաւորում պահանջող առաջնային խնդիրներէն մէկն է։ Հայաստանի Հանրապետութիւնը կտրականապէս կը մերժէ զինուած հակամարտութեան ընթացքին քաղաքացիական ենթակառուցուածքներու թիրախաւորումը, քաղաքացիական բնակչութեան դէմ բռնութիւնները եւ քաղաքացիական անձանց պատանդառումը ու գերեվարումը եւ կը միանայ առանց նախապայմաններու անոնց ազատ արձակման միջազգային հանրութեան պահանջներուն։ Հայաստանի Հանրապետութիւնը միացած է ՄԱԿ-ի Գլխաւոր ժողովի բանաձեւերուն, որոնք կոչ կ՚ընեն անյապաղ հրադադար հաստատել Կազայի մէջ։ Աւելին, Հայաստանի Հանրապետութիւնը անկեղծօրէն շահագրգռուած է Մերձաւոր Արեւելքին խաղաղութեան եւ կայունութեան հաստատմամբ, հրեայ եւ պաղեստինցի ժողովուրդներու միջեւ տեւական հաշտութեան կայացմամբ։ Միջազգային տարբեր հարթակներուն մենք մշտապէս հանդէս եկած ենք պաղեստինեան հարցի խաղաղ եւ համապարփակ կարգաւորման օգտին եւ կը պաշտպանենք իսրայէլապաղեստինեան հակամարտութեան լուծման՝ «երկու պետութիւն» սկզբունքը։ Համոզուած ենք, որ այդ միակ ճանապարհն է երաշխաւորելու, որ պաղեստինցիներն ու իսրայէլացիները կարող են իրականացնել իրենց օրինական ձգտումները։ Ելնելով վերոնշեալէն եւ վերահաստատելով իր հաւատարմութիւնը միջազգային իրաւունքին եւ ժողովուրդներու հաւասարութեան, ինքնիշխանութեան ու խաղաղ համակեցութեան սկզբունքներուն՝ Հայաստանի Հանրապետութիւնը կը ճանչնան Պաղեստինի պետութիւնը», կ՛ըսուի Հայաստանի Արտաքին Գործոց նախարարութեան յայտարարութեան մէջ։
Պաղեստինեան իշխանութիւնը ողջունեց Երեւանի քայլը, մինչ իսրայէլեան աղբիւրներ հաղորդեցին, թէ Իսրայէլի Արտաքին Գործոց Նախարարութիւն կանչուեցաւ Իսրայէլի մօտ Հայաստանի դեսպան Արման Յակոբեանը եւ այս գծով անոր «խիստ յանդիմանութիւն» փոխանցուեցաւ։
Աւելի ուշ, Հայաստանի Արտաքին Գործոց Նախարարութիւնը տարածեց այլ հաղորդագրութիւն մը, որուն մէջ կ՚ըսուի հետեւեալը. «Պաղեստինի պետութեան ճանաչման վերաբերեալ նախարարութիւնը հրապարակած է յայտարարութիւն, որուն ներկայացուած են Հայաստանի մօտեցումները, այդ թուին՝ «երկու պետութիւն» սկզբունքի մասով։ Հանրային լրացուցիչ մեկնաբանութիւն չունինք։ Այս պահուն Հայաստանի դեսպանի հետ Իսրայէլի Արտաքին Գործոց Նախարարութեան մէջ հանդիպում տեղի չէ ունեցած»։
Իր կարգին, Իսրայէլի վարչապետ Պենիամին Նեթանիահուի գրասենեակի խորհրդական Տմիթրի Կենտելման խստօրէն դատապարտեց Պաղեստինը ճանաչելու պաշտօնական Երեւանի որոշումը, զայն նկատելով «մրցանակ մը «Համաս»ին եւ պաղեստինեան այլ խմբաւորումներու ահաբեկիչներու եւ մարդասպաններուն համար»։
«Այդ քայլը լուրջ հետեւանքներ պիտի ունենայ Իսրայէլի եւ Հայաստանի յարաբերութիւններուն վրայ», աւելցուց խորհրդականը։
Ցարդ գլխաւորաբար Միջին Արեւելքէն, Ասիայէն եւ Ափրիկայէն տասնեակներով պետութիւններ ճանաչում շնորհած են Պաղեստին պետութեան։ Վերջերս անոնց միացան նաեւ Սպանիա, Իրլանտա, Նորվեկիա եւ Սլովենիա։
Անգարա ողջունեց Պաղեստինի պետութիւնը ճանչնալու՝ Երեւանի որոշումը
Թուրքիոյ Արտաքին Գործոց Նախարարութիւնը հրապարակեց յայտարարութիւն մը, որուն միջոցով ողջունեց Պաղեստին պետութիւնը ճանչնալու՝ Հայաստանի որոշումը։
«Մենք կ՚ողջունենք Սպանիոյ, Իրլանտայի, Նորվեկիոյ եւ Սլովենիոյ օրինակին հետեւելու եւ Պաղեստին պետութիւնը ճանչնալու Հայաստանի որոշումը։ Մենք միշտ ընդգծած ենք, որ Պաղեստինի ճանաչումը միջազգային իրաւունքի, արդարութեան եւ խիղճի պահանջն է», կ՛ըսուի վերոնշեալ յայտարարութեան մէջ։
Թուրքիոյ արտաքին գործոց նախարարութիւնը նաեւ կը նշէ, որ Անգարա պիտի շարունակէ ջանքեր գործադրել, որպէսզի աւելի մեծ թիւով պետութիւններ ճանչնան Պաղեստինը։
