Ըստ Հնդկական Indian Defence Research Wing լրատուական գործակալութեան ՝ Հնդկաստանի պաշտպանութեան նախարարութեան աղբիւրներ յայտնեցին, որ Հայաստան ստացած է հնդկական «Փինաքա» հրթիռային համակարգերու առաջին խումբը։
Ըստ նոյն աղբիւրներուն՝ Հայաստանին «Փինաքա» համակարգերու մատակարարման պայմանագիրը կնքուած էր շուրջ երկու տարիներ առաջ՝ երկար բանակցութիւններէ ետք։
Հայաստան՝ Միացեալ Նահանգներու եւ Ֆրանսայի հետ, հնդկական զէնքերու երեք մեծագոյն ներածողներէն մէկն է, նշեցին վերոնշեալ գործակալութեան ներկայացուցիչները։
Հնդկական հրթիռային համակարգի թիրախներու ոչնչացման հեռահարութիւնը 75-էն 80 քիլոմեթր է։
Աւելի կանուխ, Հնդկաստան սկսած էր Հայաստանին մատակարարել «Աքաշ» զենիթահրթիռային համալիրներ։ Ըստ հնդկական նոյն լրատուամիջոցին՝ ընդհանուր առմամբ, Հայաստան պատուիրած է 15 հնդկական հակաօդային պաշտպանութեան համակարգեր՝ շուրջ 720 միլիոն տոլար ընդհանուր արժողութեամբ։
Հայաստանի պաշտպանութեան նախարարութիւնը չի մեկնաբաներ ռազմական գնումները՝ խնդրելով հիմք ընդունել նախարարութեան՝ միջազգային համագործակցութեան վերաբերեալ պաշտօնական հաղորդագրութիւնները եւ իրաւասու պաշտօնատարներու յայտարարութիւնները։
Այս գծով 24 Նոյեմբերին պաշտպանութեան նախարարութիւնը նոյնիսկ հաղորդագրութիւն մը տարածեց՝ պնդելով, թէ օտար լրատուամիջոցներ կը շարունակեն Հայաստանի սպառազինութեան ձեռքբերման, ինչպէս նաեւ անոր շուրջ բանակցութիւններու մանրամասնութիւններու վերաբերեալ իրականութեան չհամապատասխանող հրապարակումներ տարածել։
«Ազատութիւն»ը կը տեղեկացնէ, որ ըստ Ժողովրդավարութեան եւ անվտանգութեան տարածաշրջանային կեդրոնի ռազմական փորձագէտ Էդուարդ Առաքելեանի՝ հնդկական «Փինաքա»ն լաւ ձեռքբերում է եւ անիկա պիտի համալրէ ռուսական «Կրատ» համազարկային համակարգը։ «Այն միջանկեալ մի բան է «Կրատ»ի եւ «Սմերչ»ի միջեւ, 214 տրամաչափով, շատ լաւ հեռահարութեամբ, 100 քիլոկրամանոց շատ լաւ մարտագլխիկով։ Ես կարծում եմ, որ սա լաւ ձեռքբերում է։ Հայաստանը նման զինատեսակ երբեք չի ունեցել։ «Պինակա»ն ինչ-որ առումով յիշեցնում է ռուսական «Ուռագան»ը՝ 220 միլիմետր տրամաչափով»։
Indian Defence Research Wing թերթը նաեւ կը տեղեկացնէ, որ Հայաստան կը բանակցի Հնդկաստանի հետ 78 միաւոր ATAGS հրետանային համակարգերու գնման շուրջ։
Էդուարդ Առաքելեան՝ անդրադառնալով ATAGS համակարգերուն՝ նշեց, որ Հայաստան 150 տրամաչափի թնդանօթներ երբեք չէ ունեցած, այդ ալ՝ համակարգչային փոխշփումով։
«Այդ համակարգերը ինքնուրոյն տեղաշարժւում են, կարող են փոխել տեղանքը առանց քարշակի օգնութեան, շատ դրական կողմեր ունեն։ Բայց թէ որքանով են այդ թնդանօթները որակեալ, բարդ է ասել, քանի որ մենք դրանք գործածութեան մէջ չենք տեսել։ ATAGS»ները միանգամայն նոր թնդանօթներ են, եւ Հայաստանն ընդհանրապէս այդ զինատեսակի առաջին պատուիրատուն է։ Անգամ Հնդկաստանը դեռ չի պատուիրել իր բանակի համար», ըսաւ Առաքելեան։
